Bacha Missa 16 January 2017

Jaku Tuhan 16 January 2017 - Hari Satu ba Minggu Kedua Musim Selama

Bacha Ke Satu:

Hebrew 5: 1 - 10

Menyadi:

Genap iku imam besai ke dipilih ari bala mensia, endang diletak bekereja ke Allah Taala ngarika mensia, meri pemeri enggau piring kena muai dosa.

Iya nemu nelap enggau orang ke nadai nemu utai, enggau orang ke enda ngasi, laban iya empu endang mayuh pengelemi.

Lalu ketegal nya, iya enda tau enda ngenjuk piring ke dosa iya empu, enggau ke dosa orang mayuh.

Nadai orang tau ngambu diri nyadi imam besai, tang semina ari kangau Allah Taala, baka Aron.

Baka nya mega Kristus. Iya enda ngemesaika Diri lalu ngaga Diri nyadi Imam Besai. Tang Allah Taala nyebut ngagai Iya, “Nuan tu Anak Aku. Sehari tu Aku udah nyadi Apai Nuan”;

munyi ti disebut Iya ba endur bukai, “Nuan nyadi Imam belama iya murihka Melkisedek.” 

Lebuh Jesus idup di dunya tu, Iya besampi sereta mantaika peminta Iya ngena sabak ti inggar, sereta enggau ai mata, ngagai Allah Taala, ke ulih ngelepaska Iya ari pemati. Lalu Allah Taala ninga Iya laban Iya baruh ati sereta nunduk ngagai Allah Taala.

Tang taja pen Iya Anak Allah Taala, Iya belajar ngasi ulih pemerinsa ti ditatka Iya;

lalu laban Iya digaga nyadi pemadu badas, Iya nyadika pun pengelepas ti meruan belama iya ke semua orang ke ngasika Iya,

laban Iya udah diletak Allah Taala nyadi Imam Besai, murihka Melkisedek.

Masmur Entara:

Masmur 110: 1, 2, 3, 4

Saut (peda 4b): Nuan tu imam belama iya Murihka Imam Melkisedek.

Ke Satu

Ku TUHAN bejaku ngagai tuan aku, “Duduk ditu muak ari kanan Aku 

datai ke Aku udah ngaga munsuh nuan nyadika pelasar kaki nuan.”

Saut: Nuan tu imam belama iya Murihka Imam Melkisedek.

Ke Dua

TUHAN deka ngerembaika kuasa diraja nuan ari Sion. 

Ku Iya bejaku, “Perintah bala munsuh nuan!”

Saut: Nuan tu imam belama iya Murihka Imam Melkisedek.

Ke Tiga

Bala nembiak nuan deka datai mantu nuan ba hari nuan deka nguluka bala nuan ba bukit ti kudus. 

Bala nembiak nuan deka datai ngagai nuan baka ambun pagi hari.

Saut: Nuan tu imam belama iya Murihka Imam Melkisedek.

Ke Empat

TUHAN udah besemaya ngena sumpah lalu Iya enda matak semaya Diri: 

“Nuan tu imam belama iya Murihka Imam Melkisedek.”

Saut: Nuan tu imam belama iya Murihka Imam Melkisedek.

Alleluia (peda Hebrew 4: 12)

Alleluia, alleluia

Jaku Allah Taala idup sereta bekuasa, 

iya ulih ngakim runding enggau niat ati mensia.

Alleluia, alleluia.

Bacha Injil:

Mark 2: 18 - 22

Nyadi sida murid John Pemaptisa enggau sida orang Parisi bepasa. Orang lalu datai ngagai Jesus, lalu nanya Iya, “Nama kebuah sida murid John Pemaptisa enggau sida murid orang Parisi bepasa, tang murid Nuan enda?”

Ku Jesus bejaku ngagai sida, “Kati bala pengabang bepasa lebuh lelaki ke ditikah agi mengkang begulai enggau sida? Seagi-agi lelaki ke ditikah nya mengkang begulai enggau sida, sida enda bepasa.

Maya deka datai alai lelaki ke ditikah nya deka diambi ari sida, nya baru sida deka bepasa.

“Nadai orang nampalka chebik kain ti baru ngagai kain ti lama, laban kain ti baru nya deka kesat lalu nyintak ari kain ti lama, lalu ngasuh kain ti lama nya balat agi charik.

Lalu nadai mega orang nuang wain ti baru ngagai kambut wain ti lama, enggai ke wain nya ngasuh kambut nya pechah, lalu wain nya deka nyaya, lalu kambut nya rusak. Wain ti baru patut disimpan dalam kambut ti baru.”

Bacha Missa 15 January 2017

Jaku Tuhan 15 January 2017 - Hari Minggu Kedua Musim Selama

Bacha Ke Satu:

Isaiah 49: 3, 5 - 6

Ku TUHAN bejaku ngagai aku, “Israel, nuan tu nembiak Aku. Ketegal nuan, orang deka muji Aku.”

Sebedau aku ada, TUHAN endang udah ngeletak aku mai bala nembiak Iya pulai baru, mai orang Israel ti udah pambar pendiau pulai baru. TUHAN meri aku basa. Iya meh nyadika pun pengering aku.

Ku TUHAN bejaku ngagai aku, “Nembiak Aku, Aku bisi pengawa ti besai agi ti diasuh Aku kereja nuan. Nuan ukai semina deka mulaika kuasa ngagai orang Israel ti agi idup, tang Aku deka mega ngaga nuan nyadika penampak ke semua bansa, ngambika semua dunya diselamatka.”

Masmur Entara:

Masmur 40: 1 & 3A, 6 - 7A, 7B - 8, 9

Saut (peda 7a & 8a): Tu aku TUHAN; aku datai ngereja peneka Nuan.

Ke Satu

Aku nganti TUHAN enggau ati ti liat. 

Iya nyingitka pending Iya, lalu ninga sabak aku.

Iya ngajar aku nyanyi lagu ti baru, 

lagu ti dikena muji Allah Taala kitai.

Saut: Tu aku TUHAN; aku datai ngereja peneka Nuan.

Ke Dua

Nuan enda begunaka piring enggau pemeri. 

Nuan nadai minta jelu ti ditunu segala ba alta 

tauka minta piring pengampun dosa. 

Tang Nuan udah meri aku pending kena aku ningaka Nuan

nya alai aku nyaut, “Tu aku.

Saut: Tu aku TUHAN; aku datai ngereja peneka Nuan.

Ke Tiga

Atur ti diberi Nuan ngagai aku bisi dalam Bup Adat.

Naka meh pengerindu ati aku ngereja peneka Nuan, O Allah Taala aku! 

Aku nyimpan ajar Nuan dalam ati aku.”

Saut: Tu aku TUHAN; aku datai ngereja peneka Nuan.

Ke Empat

Lebuh semua nembiak Nuan begempuru, O TUHAN, 

aku madahka berita manah pasal Nuan ke ngelepaska kami. 

Nuan nemu, aku sigi enggai badu nusui berita nya.

Saut: Tu aku TUHAN; aku datai ngereja peneka Nuan.

Bacha Ke Dua:

1 Korint 1: 1 - 3

Ari Paul, ke dikangauka nyadi rasul Jesus Kristus nitihka peneka Allah Taala, enggau ari menyadi kitai Sostenes,

Ngagai eklisia Allah Taala di Korint, ngagai orang ke dikuduska dalam Jesus Kristus, ke dikangauka nyadi nembiak Tuhan sama enggau semua orang di semua endur ke ngangauka nama Tuhan Jesus Kristus, ti Tuhan sida enggau Tuhan kitai:

Awakka Allah Taala ti Apai kitai enggau Tuhan Jesus Kristus meri kita berekat enggau pemaik.

Alleluia (peda John 1: 14A, 12A)

Alleluia, alleluia

Jaku nya nyadi mensia, lalu diau begulai enggau kitai,

semua orang ke nerima Iya, ke arapka nama Iya, 

diberi Iya kuasa nyadi anak Allah Taala.

Alleluia, alleluia.

Bacha Injil:

John 1: 29 - 34

Hari siti John tepedaka Jesus mansang ngagai iya, lalu ku John bejaku, “Peda kita, nyin Anak Domba Allah Taala, ke muai dosa dunya!

Nya meh orang ke dikenang aku, ‘Siku orang deka datai dudi ari aku, ke besai agi ari aku, laban Iya endang udah bisi sebedau aku ada.’

Aku empu enda ngelala Iya, tang tu meh kebuah aku datai lalu maptisa orang ngena ai, ngambika Iya dipandangka ngagai orang Israel.”

John lalu besaksi: “Aku meda Roh Kudus nurun ari seregabaka burung achang lalu meruan ba Iya.

Aku empu enda ngelala Iya; tang Allah Taalati ngasuh aku maptisa orang ngena ai, udah madahka ngagai aku, ‘Nuan deka meda Roh Kudus nurun lalu meruan ba orang siku; nya meh orang ke deka maptisa ngena Roh Kudus.’

Lalu aku empu udah meda Iya lalu aku besaksi madahka Iya nya Anak Allah Taala.”

Bacha Missa 14 January 2017

Jaku Tuhan 14 January 2017 - Hari Enam ba Minggu Keterubah Musim Selama

Bacha Ke Satu:

Hebrew 4: 12 - 16

Laban jaku Allah Taala idup sereta bekuasa, tajam agi ari pedang ti bemata dua, ti ngerejang datai ke iya nyeraraka semengat ari roh, nyeraraka buku tulang ari untak tulang; iya ulih ngakim runding enggau niat ati mensia.

Nadai utai ulih dipelalaika ari Allah Taala. Semua deka dikebak lalu diayanka magang di mua Iya. Lalu semua kitai enda tau enda madahka pasal diri empu ngagai Iya.

Nya alai, laban kitai bisi Imam Besai ti Pemadu Tinggi, ke udah pulai ke serega, iya nya Jesus, ti Anak Allah Taala, aram kitai bepegai teguh ba pengarap kitai.

Laban Imam Besai kitai ukai enda nemu sinu ati ke pengelemi kitai. Iya udah diuji ngena semua macham chara baka kitai empu, tang Iya enda bedosa.

Nya alai, aram kitai mansang enggau ati ti kempang ngagai kerusi diraja Allah Taala ti kasih, ngambika kitai ulih nerima pengasih lalu nemu berekat, kena nulung kitai lebuh kitai begunaka iya.

Masmur Entara:

Masmur 19: 7, 8, 9, 14

Saut (peda John 6: 63c): Jaku Nuan TUHAN, nya Roh enggau pengidup.

Ke Satu

Adat TUHAN endang pemadu badas. 

Iya meri pengering ti baru. 

Pesan TUHAN endang tau dikarapka 

meri penemu-dalam ngagai orang ke nadai penemu-dalam.

Saut: Jaku Nuan TUHAN, nya Roh enggau pengidup.

Ke Dua

Adat TUHAN endang ngena, 

lalu ngelantangka ati. 

Pesan TUHAN endang terang 

lalu iya ngasuh orang meretika utai.

Saut: Jaku Nuan TUHAN, nya Roh enggau pengidup.

Ke Tiga

Bebasaka TUHAN nya utai ti manah, 

lalu basa nya deka majak belama iya. 

Atur ti diberi TUHAN endang lurus. 

Atur nya endang nadai kala berat sepiak.

Saut: Jaku Nuan TUHAN, nya Roh enggau pengidup.

Ke Empat

Awakka jaku enggau runding aku 

manah dipeda Nuan, O TUHAN! 

Laban Nuan Empu ke alai aku ngenduh, 

sereta nyadi penebus aku!

Saut: Jaku Nuan TUHAN, nya Roh enggau pengidup.

Alleluia (peda Luke 4: 18)

Alleluia, alleluia

Tuhan nata Aku ngambika Aku nusui Berita Manah ngagai orang ke seranta,

lalu madahka pengelepas ke orang ke kena tangkap.

Alleluia, alleluia.

Bacha Injil:

Mark 2: 13 - 17

Jesus bejalai baru ngagai tebing Danau Galili, lalu bala orang mayuh begelumu ngelingi Iya, lalu Iya ngajar sida.

Lebuh Iya benung bejalai, Iya tepedaka Lewi anak Alpius duduk dalam opis pengumpul chukai. Iya lalu bejaku ngagai Lewi, “Titihka Aku.”Lewi angkat lalu nitihka Iya.

Lebuh Iya makai dalam rumah Lewi, mayuh pengumpul chukai enggau orang ke bedosa makai sama enggau Iya sereta enggau murid Iya, laban mayuh sida nya nitihka Iya.

Lebuh sida pengajar Adat enggau orang Parisi meda Jesus begulai makai enggau orang ke bedosa, sereta enggau pengumpul chukai, sida lalu bejaku ngagai sida murid Iya, “Nama kebuah Iya begulai makai enggau pengumpul chukai sereta enggau orang ke bedosa?”

Lebuh Jesus ninga nya, Iya lalu bejaku ngagai sida, “Orang ke gerai enda begunaka lutur, tang semina orang ke sakit.Aku datai ukai deka ngangauka orang ke lurus, tang orang ke bedosa.”

Bacha Missa 13 January 2017

Jaku Tuhan 13 January 2017 - Hari Lima ba Minggu Keterubah Musim Selama

Bacha Ke Satu:

Hebrew 4: 1 - 5, 11

Nya alai, seagi-agi semaya ti ngasuh kitai tama ngagai endur alai Allah Taala belelak nya agi meruan, kitai enda tau enda bejimat ngambika nadai siku kitai ditemu enda patut tama ngagai endur nya.

Laban Berita Manah ti didinga kitai sebaka enggau Berita Manah ti didinga sida, tang pesan ti didinga sida nadai pulai ke penguntung sida, laban sida enda nerima pesan nya ngena pengarap.

Nya alai kitai ke arap, tama ngagai endur alai Allah Taala belelak, munyi ti disebut Allah Taala, “Aku ringat lalu besumpah: ‘Sida enda tau tama ngagai endur alai Aku belelak,’ “taja pen pengawa Iya udah tembu kenyau ari penumbuh dunya.

Laban pasal hari ti ketujuh udah disebut munyi tu: “Lalu ba hari ti ketujuh Allah Taala belelak ari semua pengawa Iya.”

Lalu Iya bejaku baru: “Sida enda tau tama ngagai endur alai Aku belelak.”

Nya alai, aram kitai enggau naka ulih tama ngagai endur alai belelak nya, ngambika nadai siku kitai enda mujur baka sida ketegal enda ngasi.

Masmur Entara:

Masmur 78: 3 & 4BC, 6C - 7, 8

Saut (peda 7b): Seruran ingatka utai ti udah dikereja TUHAN.

Ke Satu

Utai ti udah didinga sereta ditemu kitai, 

utai ti udah dipadahka aki ini kitai ngagai kitai.

Kitai deka madahka utai nya ngagai serak ti nangkanka kitai 

pasal kuasa TUHAN, enggau pasal pemesai pengawa Iya.

Saut: Seruran ingatka utai ti udah dikereja TUHAN.

Ke Dua

Sida ulih belajarka adat nya lalu madahka adat nya ngagai bala anak sida.

Nya meh jalai sida deka manggaika pengarap sida ba Allah Taala 

lalu seruran ingatka utai ti udah dikereja Iya, 

sereta seruran ngasika pesan Iya.

Saut: Seruran ingatka utai ti udah dikereja TUHAN.

Ke Tiga

Sida enda baka aki ini sida 

ke seruran angkat ngelaban sereta enda ngasi, 

ti nadai kala manggaika pengarap sida tegap ba Allah Taala 

lalu enda tetap ati ngagai Iya.

Saut: Seruran ingatka utai ti udah dikereja TUHAN.

Alleluia (peda Luke 7: 16)

Alleluia, alleluia

Nabi ke besai udah pegari ba bala kitai! 

Allah Taala udah datai nulung nembiak Iya!

Alleluia, alleluia.

Bacha Injil:

Mark 2: 1 - 12

Lebuh Iya pulai ngagai Kapernaum kira dua tiga hari udah bekau nya, orang lalu madahka Iya bisi di rumah.

Mayuh amat orang begempuru dia, datai ke rumah nya nyau enda muat alai sida. Di mua pintu pen nadai meh endur.Lalu Iya nusui pesan Allah Taala ngagai sida.

Empat iku lelaki datai ngagai Iya, mai orang siku ke sakit bajung.

Laban orang kelalu mayuh, sida enda ulih mai orang nya ngagai Jesus, lalu sida ngerumbak perabung ba senentang endur alai Jesus, lalu ngulurka orang ke sakit nya ngena tikai iya empu.

Lebuh Jesus meda pengarap sida, Iya lalu bejaku ngagai orang ke sakit bajung nya, “Anak, dosa nuan diampun.”

Sekeda pengajar Adat ke duduk dia lalu betanya dalam ati diri,

“Nama kebuah orang tu bejaku munyi nya? Nya jaku busung! Semina Allah Taala aja ulih ngampun dosa!”

Tekala nya Jesus nemu utai ti diperagam ati sida, lalu ku Iya, “Nama kebuah kita beperagamka utai ti baka nya?

Ni ti mudah agi disebut ngagai orang ke sakit bajung tu, ‘Dosa nuan diampun,’ tauka ‘Angkat, bai peninduk nuan, lalu bejalai’?

Tang ngambika kita nemu Anak Mensia bisi kuasa di dunya tu ngampun dosa,” Iya lalu bejaku ngagai orang ke sakit bajung nya,

“Aku bejaku ngagai nuan: angkat nuan! Bai peninduk nuan, lalu pulai ke rumah!”

Orang nya lalu bediri, lalu tekala nya ngambi peninduk iya, lalu pansut ari endur nya dipeda semua sida. Semua sida lalu balat alit ati, lalu ngemuliaka Allah Taala. Ku sida, “Nadai kitai udah kala meda utai baka tu!”

Bacha Missa 12 January 2017

Jaku Tuhan 12 January 2017 - Hari Empat ba Minggu Keterubah Musim Selama

Bacha Ke Satu:

Hebrew 3: 7 - 14

Nya alai, munyi ti disebut Roh Kudus, “Sehari tu, enti kita ninga nyawa Iya, anang ngasuh ati kita kieh, baka aki ini kita ke angkat ngelaban, lebuh maya penguji di menua puang, alai aki ini kita ke nguji Aku, taja pen sida udah meda utai ti dikereja Aku dalam kandang empat puluh taun.

Nya alai Aku ringat ngagai bala orang ke ari serak nya, lalu ku Aku nyebut, ‘Ati sida seruran limpang, lalu sida apin nemu jalai Aku.’

Aku ringat lalu besumpah: ‘Sida enda tau tama ngagai endur alai Aku belelak!’ “

Bejimat kita, menyadi, enggai ke kita ngembuan ati ti jai, ati ti enda arap, lalu ninggalka Allah Taala ti idup.

Tang peransang pangan diri tiap hari, seagi-agi hari tu dikumbai “Sehari tu,” ngambika nadai siku kita ditipu dosa lalu nyadi kieh.

Laban kitai nyadi tawing Kristus enti kitai bepegai teguh ba ati ti kempang datai ke ujung, baka ti dikembuan kitai ba pun iya suba.

Masmur Entara:

Masmur 95: 6 - 7B, 7C - 9, 10 - 11

Saut (peda 7C - 8A): Sehari tu dingaka utai ti disebut Iya: Anang kieh!

Ke Satu

Aram kitai meremi lalu nyembah Iya. 

Aram kitai besugang di mua TUHAN ti udah ngaga kitai!

Iya endang Allah Taala kitai. 

Kitai tu orang ke diibun Iya, raban ke ditupi Iya.

Saut: Sehari tu dingaka utai ti disebut Iya: Anang kieh!

Ke Dua

Sehari tu dingaka utai ti disebut Iya:

“Anang kieh, baka aki ini kita di Meribah, 

baka sida sehari nya di menua puang di Masah.

Dia meh alai sida ke ngabas ati Aku sereta nguji Aku, 

taja pen sida udah meda utai ti udah dikereja Aku.”

Saut: Sehari tu dingaka utai ti disebut Iya: Anang kieh!

Ke Tiga

Empat puluh taun Aku udah kejika orang nya. 

Ku Aku, ‘Naka meh pemalat sida tu enda taluk! 

Sida enggai ngasika pesan Aku.’

Aku ringat, lalu besemaya ngena sumpah. 

‘Kita enda ulih tama ngagai menua ti alai Aku deka ngasuh kita belelak.’

Saut: Sehari tu dingaka utai ti disebut Iya: Anang kieh!

Alleluia (peda Matthew 4: 23)

Alleluia, alleluia

Jesus nusui Berita Manah pasal Perintah Allah Taala, 

sereta ngeraika orang ke kena laban semua macham penyakit enggau pemedis.

Alleluia, alleluia.

Bacha Injil:

Mark 1: 40 - 45

Siku lelaki ke sakit lan datai ngagai Jesus, besugang, minta tulung Jesus. Ku iya, “Enti Nuan deka, Nuan ulih ngasuh aku tuchi.”

Enggau ati ti sinu ke iya Jesus ngunjurka jari lalu negu orang nya, lalu bejaku, “Aku deka. Tuchi meh nuan!”

Tekala nya penyakit nya lalu nadai agi ba orang nya, lalu iya nyadi tuchi.

Lebuh Jesus udah berat-rat nangkan orang nya enggau jaku, Iya lalu kemaya nya ngasuh iya mupuk.

Ku Jesus bejaku ngagai iya, “Anang madahka tu ngagai orang, tang mansang nuan ngagai imam lalu asuh iya meresa nuan, lalu beri piring ti udah diletak Moses, kena nuan mandangka diri ngagai orang mayuh nuan udah tuchi.”

Tang orang nya mupuk lalu belabuh nusui berita nya di semua endur. Ketegal nya Jesus nyau enda ulih agi ngayanka Diri lebuh Iya tama ngagai nengeri. Tang Iya diau di luar ba endur ti sunyi, lalu orang datai ngagai Iya ari semua endur.

Bacha Missa 11 January 2017

Jaku Tuhan 11 January 2017 - Hari Tiga ba Minggu Keterubah Musim Selama

Bacha Ke Satu:

Hebrew 2: 14 - 18

Nya alai, laban bala anak endang mensia, Jesus mega nyadi mensia baka sida, ngambika ulih pemati Iya, Iya ulih ngerusak Sitan ke megai kuasa pemati, lalu ngelepaska semua orang ke nyadi ulun seumur idup ari penakut sida ke pemati.

Laban utai tu terang, ukai melikat ke ditulung Iya, tang peturun Abraham.

Nya alai Iya enda tau enda digaga sebaka enggau bala menyadi Iya dalam semua utai, ngambika Iya nyadi Imam Besai ti kasih, sereta tetap ati bekereja ke Allah Taala, ngambika Iya ngaga piring kena muai dosa orang mayuh.

Laban Iya Empu udah merinsa lebuh Iya diuji, nya alai Iya ulih nulung orang ke kena laban penguji.

Masmur Entara:

Masmur 105: 1 - 2, 3 - 4, 6 - 7, 8 - 9

Saut (peda 8a): TUHAN deka ingatka sempekat Iya belama iya.

Ke Satu

Beri terima kasih ngagai TUHAN. Padahka pemesai kuasa Iya. 

Tusui ngagai semua bansa utai ti udah dikereja Iya.

Belagu muji TUHAN. 

Tusui pasal utai ti badas ti udah dikereja Iya.

Saut: TUHAN deka ingatka sempekat Iya belama iya.

Ke Dua

Gaga ati meh kitai ke enggi Iya.

Awakka semua orang ke nyembah Iya rami gaga magang.

Mansang meh kitai ngagai TUHAN minta Iya nulung, 

lalu sembah Iya berari.

Saut: TUHAN deka ingatka sempekat Iya belama iya.

Ke Tiga

Kita peturun Abraham ke nembiak Iya 

kita peturun Jakop ti udah dipilih Iya.

TUHAN endang Allah Taala kitai. 

Pesan Iya endang ke semua dunya.

Saut: TUHAN deka ingatka sempekat Iya belama iya.

Ke Empat

Iya deka ingatka sempekat Iya belama iya, 

semaya ti diberi Iya ngagai seribu serak.

Iya deka ingatka sempekat ti udah digaga Iya enggau Abraham 

enggau semaya ti digaga Iya enggau Isak.

Saut: TUHAN deka ingatka sempekat Iya belama iya.

Alleluia (peda John 10: 27)

Alleluia, alleluia

Bedus Aku mendingka nyawa Aku, ku TUHAN. 

Aku ngelala sida, lalu sida nitihka Aku.

Alleluia, alleluia.

Bacha Injil:

Mark 1: 29 - 39

Lebuh Jesus mupuk ari balai gempuru nya, Iya enggau James seduai John tama ngagai rumah Simon seduai Andrew.

Nyadi mentua indu Simon gali sakit chelap angat, lalu sida madahka pasal iya ngagai Jesus.

Jesus mansang lalu megai jari mentua Simon, lalu ngangkatka iya. Iya lalu gerai, lalu belabuh mela sida.

Lebuh padam mata panas lemai nya, orang mai ngagai Jesus semua orang ke sakit, tauka dirasuk antu.

Lalu semua orang di nengeri nya begelumu di mua rumah nya.

Iya ngeraika mayuh orang ke sakit laban mayuh macham pemedis, lalu muru mayuh antu.Iya enda nyagi sida antu bejaku, laban sida ngelala sapa Iya.

Pagi hari siti, sebedau rerak tawas, Jesus angkat, lalu bejalai ngagai siti endur ti sunyi, lalu besampi.

Simon enggau bala pangan iya lalu ngiga Iya.

Lebuh sida udah tetemuka Iya, sida lalu bejaku, “Semua orang ngiga Nuan.”

Ku Iya nyaut, “Aram kitai bejalai ngagai nengeri bukai, ngambika Aku nusui Berita Manah dia mega, laban nya endang kebuah Aku datai.”

Iya lalu bejalai di serata menua Galili, nusui Berita Manah dalam balai gempuru sida, lalu muru antu.