Jaku Tuhan Ninting Hari

Jaku Tuhan 4 January 2017 - Memorial of Saint Elizabeth Ann Seton, Religious

Bacha Ke Satu:

1 John 3: 7 - 10

Anak, anang nejuka orang nipu kita! Genap iku orang ke ngereja utai ti badas, endang amat lurus baka Kristus Empu.

Genap iku orang ke bedosa endang anak Sitan, laban Sitan endang udah bedosa kenyau ari pun. Kebuah Anak Allah Taala dipandangka nya ngambika Iya ngerusak pengawa Sitan.

Orang ke udah diadaka Allah Taala enda agi bedosa laban benih Allah Taala meruan dalam sida; sida enda ulih bedosa laban sida udah diadaka Allah Taala.

Baka tu ku jalai kita ngelala sapa ke anak Allah Taala, enggau sapa ke anak Sitan: barang sapa enda diau lurus, ukai anak Allah Taala. Orang ke enda rinduka menyadi diri, ukai anak Allah Taala.

Masmur Entara:

Masmur 98: 1, 7 - 8, 9

Saut (peda 3cd): Semua bansa di semua endur udah meda pemenang Allah Taala kami.

Ke Satu

Nyanyi pantun ti baru ke TUHAN. 

Iya udah ngereja utai ti badas! 

Ngena kuasa Iya enggau pengering Iya ti kudus 

Iya udah bulih pemenang.

Saut: Semua bansa di semua endur udah meda pemenang Allah Taala kami.

Ke Dua

Inggar meh nuan tasik, enggau semua utai ti idup dalam nuan. 

Belagu meh nuan dunya, enggau semua ke idup ba nuan!

Tempapka jari kita, sungai. 

Kita bukit, belagu sama sereta enggau ati ti gaga di mua TUHAN.

Saut: Semua bansa di semua endur udah meda pemenang Allah Taala kami.

Ke Tiga

Laban Iya datai deka merintah dunya. 

Iya deka merintah semua bansa di dunya 

ngena atur ti lurus sereta betul.

Saut: Semua bansa di semua endur udah meda pemenang Allah Taala kami.

Alleluia (peda Hebrew 1: 1 - 2)

Alleluia, alleluia

Dulu kelia Allah Taala suah bendar bejaku ngagai aki ini kitai, 

ngena mayuh macham chara, beseruanka sida nabi,

tang ba hari ti penudi tu, Iya udah bejaku ngagai kitai ngena Anak Iya Empu.

Alleluia, alleluia.

Bacha Injil:

John 1: 35 - 42

Hari siti John bediri baru enggau dua iku ari sida murid iya,

lalu lebuh iya ngemataka Jesus mansa, iya lalu bejaku inggar, “Peda seduai! Nyin Anak Domba Allah Taala!”

Lebuh seduai iya ninga John nyebut nya, seduai iya lalu nitihka Jesus.

Lebuh Jesus nguing lalu tepedaka seduai iya nitihka Iya, Iya lalu bejaku ngagai seduai iya, “Nama utai digiga seduai?” Seduai iya lalu nyaut, “Rabbi,” (reti nya, Pengajar,) “dini alai Nuan diau?”

Jesus lalu nyaut seduai iya, “Aram kitai meda.” Sida datai ba endur alai Iya diau, lalu seduai iya diau enggau Iya sehari nya. Hari nyau udah pukul empat lemai.

Siku ari seduai ke ninga John bejaku, lalu nitihka Jesus, nya Andrew, menyadi lelaki Simon Peter.

Andrew lalu ngiga menyadi lelaki iya Simon, lalu madah ngagai iya, “Kami udah tetemuka Messiah.” (Reti nya: Iya ke udah ditata; tauka Kristus).

Andrew lalu mai Simon ngagai Jesus.  Jesus malik ngagai Simon, lalu bejaku, “Nama nuan Simon anak John, tang nuan deka dikumbai Kephas.” (Reti nya Peter).