Jaku Tuhan Ninting Hari

Jaku Tuhan 2 January 2017 - Memorial of Saints Basil the Great and Gregory Nazianzen, Bishops and Doctors of the Church

Bacha Ke Satu:

1 John 2: 22 - 28

Sapa orang ke bula? Orang ke bula nya orang ke ngumbai Jesus nya ukai Kristus. Nya meh Munsuh Kristus, orang ke besangkalka Apai enggau Anak.

Nadai orang ke besangkalka Anak, bisi Apai dalam iya; barang sapa ngaku Anak, bisi Apai dalam iya.

Awakka utai ti didinga kita kenyau ari pun, meruan dalam kita. Enti utai ti didinga kita kenyau ari pun meruan dalam kita, kita deka meruan dalam Anak, enggau dalam Apai.

Tu utai ti udah disemaya Iya ngagai kitai - pengidup ti meruan belama iya.

Aku nuliska tu ngagai kita pasal orang ke deka nipu kita.

Tang ba pasal kita empu, Roh ti udah diterima kita ari Iya  meruan dalam kita. Nya alai kita enda begunaka orang ngajar kita, laban Roh Iya ngajar kita semua utai. Lalu ajar Iya endang amat, ukai utai ti bula. Nya alai, munyi ti udah diajar ngagai kita, awakka kita meruan dalam Iya.

Nya alai, anak, meruan dalam Iya, ngambika lebuh Iya dipandangka, kitai deka kempang ati lalu enda malu bediri di mua Iya lebuh Iya datai.

Masmur Entara:

Masmur 98: 1, 2 - 3AB, 3CD - 4

Saut (peda 3cd): Semua bansa di semua endur udah meda pemenang Allah Taala kami.

Ke Satu

Nyanyi pantun ti baru ke TUHAN. 

Iya udah ngereja utai ti badas! 

Ngena kuasa Iya enggau pengering Iya ti kudus 

Iya udah bulih pemenang.

Saut: Semua bansa di semua endur udah meda pemenang Allah Taala kami.

Ke Dua

TUHAN madahka pemenang Iya. 

Iya ngasuh semua bansa nemu kuasa Iya ti ngelepas.

Iya ngamatka semaya Iya ngagai orang Israel 

ngena ati ti tetap enggau pengerindu ti meruan belama iya.

Saut: Semua bansa di semua endur udah meda pemenang Allah Taala kami.

Ke Tiga

Semua bansa di semua endur 

udah meda pemenang Allah Taala kami.

Belagu gaga ati ke TUHAN, semua kita dunya. 

Puji Iya ngena pantun enggau panjung gaga ati!

Saut: Semua bansa di semua endur udah meda pemenang Allah Taala kami.

Alleluia (peda Hebrew 1: 1 - 2)

Alleluia, alleluia

Dulu kelia Allah Taala suah bendar bejaku ngagai aki ini kitai beseruanka sida nabi;

tang ba hari ti penudi tu, Iya udah bejaku ngagai kitai ngena Anak Iya Empu.

Alleluia, alleluia.

Bacha Injil:

John 1: 19 - 28

Tu saksi John, lebuh orang Judah ngirumka sida imam enggau orang Lewi ari Jerusalem lalu nanya iya, “Sapa nuan tu?”

John lalu ngaku, ukai besangkal, tang ngaku, “Aku ukai Kristus.”

Sida lalu nanya iya, “Enti pia, kati nuan tu Elijah?” “Ukai,” ku John nyaut. “Kati nuan tu nabi nya?” ku sida nanya. “Ukai,” ku iya nyaut.

Sida lalu nanya iya, “Sapa nuan tu deh? Padahka ngagai kami, ngambika kami bisi saut dibai ngagai orang ke ngirumka kami. Baka ni ku nuan madahka pasal diri empu?”

Ku John bejaku, “Aku tu orang ke ngangau di menua puang: ‘Gaga jalai Tuhan rurus!’ munyi ti disebut nabi Isaiah.”

Nyadi bala seruan nya udah dikirumka orang Parisi.

Sida lalu nanya iya, “Enti pia, nama kebuah nuan maptisa orang, enti nuan ukai Kristus,tauka ukai Elijah, tauka ukai nabi nya?”

John lalu nyaut sida, “Aku maptisa ngena ai, tang ba bala kita bisi siku ke enda dikelala kita, ke datai dudi ari aku. Indah muka tali kasut Iya deh aku enda tau.”

Pekara tu nyadi di Betani, di seberai Sungai Jordan, alai John ke maptisa orang.