Total Pageviews

Monday, 9 January 2017

Bacha Missa 9 January 2017

Jaku Tuhan 9 January 2017 - Hari Satu ba Minggu Keterubah Musim Selama (The Baptism of the Lord)

Bacha Ke Satu:

Isaiah 42: 1 - 4, 6 - 7

Ku TUHAN bejaku, “Tu nembiak Aku, ke diberi Aku pengering, ti udah dipilih Aku, sereta dikerinduka Aku. Aku udah ngisi iya enggau Roh Aku, lalu iya deka mai atur ti lurus ngagai genap bengkah bansa.
Iya enda manjung tauka merakka nyawa iya tauka bejaku enggau nyawa ti inggar ba sebelah jalai raya.
Iya enggai matahka buluh ti melepi tauka madamka lampu ti kelap-kelap. Iya tetap deka mai atur ti lurus ngagai semua mensia.
Iya deka mengkang andal ati sereta enda lemi semengat. Iya deka numbuhka atur ti lurus di dunya tu. Menua ti ba tebing tasik deka gagit ati nganti ajar ari iya.”

“Aku ti TUHAN udah ngangauka nuan lalu meri nuan kuasa nentuka atur ti lurus dipejalaika di dunya. Ulih nuan, Aku deka ngaga siti sempekat enggau semua mensia. Ulih nuan, Aku deka mai penampak ngagai semua bansa.
Nuan deka menchelakka mata orang ke buta lalu ngelepaska orang ari rumah jil.

Tauka:

Kereja Rasul 10: 34 - 38

Peter lalu belabuh bejaku ngagai sida: “Aku nemu Allah Taala endang amat enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.
Kita nemu pesan ti dikirumka Iya ngagai orang Israel, ti ngajar pemaik ulih Jesus Kristus, ke nyadi Tuhan ke semua mensia.
Pesan nya udah ngelekai di serata menua Judea, berengkah ari Galili, udah bekau John ke madahka pasal baptisa, pasal Allah Taala ke nata Jesus orang Nasaret ngena Roh Kudus enggau kuasa, pasal Jesus ke bejalai ngagai mayuh bengkah endur ngereja pengawa ti manah, lalu ngeraika semua orang ke dirasuk antu, laban Allah Taala bisi enggau Iya.


Masmur Entara:

Masmur 29: 1 - 2, 3A & 4, 3B & 9B & 10

Saut (peda 11b): TUHAN meri pemaik ngagai bala nembiak Iya.

Ke Satu
Puji meh TUHAN, kita orang serega. 
Puji meh mulia enggau kuasa Iya.
Puji meh nama TUHAN ti bemulia. 
Meremi di mua Iya ti kudus lebuh Iya pegari.

Saut: TUHAN meri pemaik ngagai bala nembiak Iya.

Ke Dua
Nyawa TUHAN bisi didinga di tasik. 
lalu munyi nyawa Iya belauh ba tasik.
Nyawa TUHAN ti bekuasa sereta bemulia bisi didinga.

Saut: TUHAN meri pemaik ngagai bala nembiak Iya.

Ke Tiga
Allah Taala ti bemulia bejaku munyi guntur,
semua orang dalam Rumah TUHAN manjung nyebut, “Muliaka Allah Taala!”
TUHAN merintah ai ti dalam. 
Iya nyadi Raja belama iya.

Saut: TUHAN meri pemaik ngagai bala nembiak Iya.


Alleluia (peda Mark 9: 7)

Alleluia, alleluia
Siti remang lalu ngelindung sida, lalu nyawa bisi didinga bejaku ari dalam remang nya, 
“Tu Anak ke dikesayauka Aku. Pendingka Iya!”
Alleluia, alleluia.

Bacha Injil:

Matthew 3: 13 - 17

Udah bekau nya Jesus datai ari Galili ngagai John di Sungai Jordan ngambika Iya dibaptisa ulih John.
John nguji nagang Iya. Ku John, “Aku baru patut dibaptisa ulih Nuan, lalu Nuan datai ngagai aku?”
Tang ku Jesus nyaut iya, “Awakka baka nya aja diatu. Laban kitai enda tau enda ngereja semua utai ti lurus.” John lalu besetuju.
Lebuh Jesus udah dibaptisa, Iya pansut ari dalam ai. Langit lalu tebuka. Iya lalu meda Roh Allah Taala nurun lalu inggap ba Iya baka burung achang.

Siti nyawa lalu bejaku ari serega, “Tu Anak ke dikesayauka Aku. Aku rinduka Iya.”

No comments:

Post a Comment